Sena’aso

Ji´ojpuari

Ju pajkola senasom, inime bempola jiawaita jojoa, mam betaimpo tajtajtawaateko; jume pajkola senaasom kolensiapo anwapo uju’uwa, jewi masota ama ye’eo o cheasan ketun kee yewao weyeo, bweta jiba samai tampaleota jiawai jajane. Ju senaso abasopo ya’ari into naabusti juka kuta tekwata yeu wikkriana junum intoko goi kobrem kokoelaim nasuk gojoim ama kibachane junuen beja juka jiawaita joone.

Ju jiawai senasota joateko ju pajkola jume senason jikau noinoitaka a mam betaipo kom a tajtajtane, junuen a jooaka ju pajkola jaiki jiawaita joome; ju pajkola yi’iwame si unna a takawata yekaka yi’ine junum intoko jume senaso áe welisi ket kolensiapo jiusimne, bweta ket jiba samai tampalota jiawaimak weene, ama nabusti ket a takawa ket ama te remtane, jaisa juka kobata joone, jume goki, jikau tubutuktine, mamam ettapone, rebe into jikau tono tenee, bwe jiba juka tampaleo jiawaita noka’u joosimne.

A teawam yoi nokiu nuuri, ‘sonajam’ teame, bweta jume jiakim a jiawaiwi a tammachia, junue betchibo jumaa inime senason jume paaren in wain am junaktek. Jume senason ket pajkola majkau chaapti lutu’uriak, junue betchibo ket kaa lepti juneewaa inia betana, jiakim betchibo ju senaso into ju pajkola jianira inim jiak bwiarapo kaa jubwa naateka jipuuwa ian tajatia.