Koyolim

Ji´ojpuari

Jume koyolim jiak pajkolatau tamachiari, jewi, junume koyolim, ju Jiak pajkola pajkopo ujbwanta toboktako, yumaisi weene, aapo koyolim weiyane, natebaeteko piisam bwaitelataka áe bepa am wikostene; jume koyolim waka bea turu’ipo ya’ari, ket jiba benasi jume koyolim ket bea bocha wikiammea koyol wikos beapo kom chaarine, ket jiba benasi koyolim mayoampo ket bocha wikiam jippue, aemak wikojpo omo suma betchibo; jume koyolim beja sisigok latampo ya’ari bweta waate ket bronsepo am jojoa.

Jume koyolim jiakim betana juka bawe aniata etejo “koyom” jiawaita ama teuwa; ama nabusti ket waka Jiak utteata ama etejo bwe’ituk gos naiki koyolim jipuune junum koyolimpo, junume beja jume gos naiki puepplom teuwa, jume goi bat ama yeu machime Bikata into Potata ama etejo. Kaa jubwa naateka into jiak koyolim bo’o jajakeka, kaita ile benak ama teuwa, jewi bempo itom yoyo’owam bawe koyom yo’orisuk into am tuuwa juneiya bwe’ituk bempo jume jiakim kaa jubwa naateka itom bwiata uju’uka omo jiapsi ania, ket jiba benasi bawetat mammatteka nas kuakatek, junumpo aman jumak juka bawe tuuwata omo nunutua junuen beja jume koyolim uju’u, bawe aniau ket omo nawala.