Pajkola tampaleo kubaje

Ji´ojpuari

Pajkola tampaleo kubaje. Ju jiak kubaje: ju jiak kubaje watapo ya’ari, jewi, betala yaana aet chukula intoko koela poponna, aet chukula into kabaa bea bektita aet bea ae jijone o jiikne siime inii ili kabaa bea bektimak wiloskosi yaarikmak into maamea a jijoone (jiikna), senu kuta asolata weiya, junume intoko gotobo kutapo jojowa ó wate intoko juupa kutapo am jojoa, o cheasan wata kutapo. Jume jiak kubajem jakgopo naateka inim jiakim nasuku uju’uwa ketun kee jume yoin in wain yajao, jaibu uju’uwan, junuen a etejo jume inia betana am bo’o jajjaseme into itom yo’owam; ju jiak kubaje kaa jubwa naateka uju’uwa jaiki weepo te ama renta: ju pajkola tamapaleo wepul ili kuta asolata jiba uju’u, bweta ju wiko ya’ura kubajae goi kuta asolam ama uju’u a jiutua betchibo, ket jume matachinim restepo ket ju kubaje ama jiune junume into ket goi ili kuta asolam uju’u, into jume matachín bem kubajepo ket goi kuta asolam uju’u bweta ket ama nabusti bempo jume matachinim ili kuerata ili kokamak nasuk chaarimta ama weiya, junuen beja ili saririti a jiutuane, junu into jaibu matachín jiawai.

Ju pajkola kubaje jiak pajkopo, juka tuulisi yi’iwamta e’etejo into ket ye yi’i nunnu, masota, pajkolata, into siime jume kolensiapo nasuk omo uju’ume tetejwa pajkota betana; ju jiak kubaje jiawai kusisi into kalaskosi kolensiapo waiwa jiune, jiapsipo allerim ye tetejwa.