Pajkola ye’eme

Ji´ojpuari

Yoemta yumaisi takaa ama yaari; aapo ju yoeme, juka jiak pajkola yumalisi omo yaalata etejo, piisam bwajek, koyolim jippue, teneboim, majkaa bwe tua yumaisia ama yeu maachi. Ju pajkola noki kaa jubwa naatekai pajkoampo uju’uwa, bwe’ituk aapo chibato majkapo pujbateko tua baliichisi etejone, into ju batoora ama pajkopo aneme tua kaabe áu o’omte, alasu aet a jajariwa.

Ju kabaa ju pajkolam yo’awa, siime inika tuuwa wemta jippue, into jume jiak pajkolam chea a ta’abaekai áu omo neneka yo’o jo’arapo; ju yo’o jo’ara kaa nanancha juneiyawa, waate kia kaupo ju kabaa ama nas weamne into watem yuyyumaka kau bicha am nuksisimeka juka a tuuwawata ameu nanaikia; wate into jan bempo jan siki kawiu noiteka awa netane ti jijia; ju koyolim into jume teneboim kaa jubwa naateka jiakim a uju’u, ketun kee yoim im jiak bwiarau yajao, jaibu uju’uwan. Bweta jume yoi paaren im yajako ju jiak pajkolatau tabwik wemta au chuaktak : ju aapa, ju laaben, ju guitarra, into wa te’opopo santora sonim yiyitaitek aapawi into labenewi.

Ju pajkola into jaisa omo aanala: piisam bwajitela, kaa susupete; jume chonim jika paaku chabula susuma, junu’u into itom áchai taa’atau bicha tachiriata netane; abas nawapo o chea batnaataka ket basekapo ya’arik majka chukuisi yokaik teteebem chao boakame jiipune, tua koba mejeriapo into kujta jippue, junu’u into juka bemela lutu’urata teuwa Liosta betana, junu pajkola majka tampaleotau ye’eteko ae omo pujba patpatta, bweta aapau ye’eteko pujba chakaku a nunupne, amak into bi’ampo.

Kaa boochaka yeye’e ju pajkola, ama nabusti ju jiak pajkola tampaleotau ye’eteko senasom jiutuane, ju pajkola unna balichi, kia kabem yo’oremta bénasi jiune into kia aapo juni kaa omo yoremta benane, bweta aapo junuen maachi. Bwe jiak pajkompo bwe’u baka pajko ramaa yejtene, junum kolensiapo beja jume pajkolam into ju maaso ama yeu yajaka juka bem alabansa jooa.