Maso ba’a bweja

Ji´ojpuari

Maso ba’a bweja: Ju jiak ba’a bwejai o ba’apo bwejai; ju ba’a bwejai jaibu jiutuawao, aapo a ba’a bwejai tukapo ámani aapela juka jiawaita jojoa; naiki weemta weiya, bwe’u baabu kajeete, senu bwe’u ba’a bweja, senu ili wikia bwejata ae suma betchibo jaibu bwe’u baabu kajete ba’ammea tapunik bepa a jipuuna betchibo; ju samai ba’a jiponleo mikoimmea juka ba’a bwejata bwijne into batammake into juka kuta asolata jippueka ba’a bwejata bepne; ju ba’a bweja jiawai mekka kusisi jiune, masota yi’i nunune.

Jaisa mammattewa ju jiak maso ba’a baweja’i jiakim nasuku: jewi ju maso ba’a baweja’i jiakim nasuku juka ju ba’a juka bwia aniata utteata etejo, intosan ju bweja’i juka ba’ata mamantepo ámani junuu into bem yo’o jo’arau bicha bem nawa lutu’urikamta nawa bo’o jooriamta ama nawa etejo. Ama nabusti senu yo’ora noki ket ama yeu maachi: jan ju jiak baa’a bweja’i a jiutaiteko jan juka maso jiapsita jijiabistetua, junue betchibo su maso yeye’me bat juka ba’a bwejata jikkajako junak beja kolensiapo into maso bwikkleom bichapo nas kiktetaitine bwe’ituk ju yo’awa jaibu a yumaalatune.

Kaa lutu’uria jiak ba’a bwejata betana yoi betana in wain jiak bwiarapo kom tojiwakapo ámani bwe’ituk junu kaa lutu’uria; bempo kaa bem yoi jo’ara betana a nuupak bwe’ituk inime ba’a bweja’im in wain joome, jiakim nasuku into siime waate itom ou sailam kaa jubwa naataekai am uju’uk.