Kubaji

Ji´ojpuari

Ju kubaji woi chakaku chabwai, wata kuta betalipo, arota bénasi ya’ari, aet chukula into kabaa beata aet kabaa beamak aet a ji’ikne. Ju kubaji ket woi ili kuta asoolak, junume into gotobopo jojowa o cheasan juupapo. Jaikika inia jiak kubajita betana a bo’o jajaseka junuen omo tetemaisuk into siime inian a lutu’uriak, ju jiak kubaji kaa jubwa nateka inim jiak bwiarapo uju’uwapo wate itom ousalim benasia.

cha´abwiai woi chaka´aku, wata kuta ko´elaipo ya´ari , kabaa beeapo into wikia beea ji´iki. Jume jiponiam ju´upa kutapo ya´ari, wotobopo ket aa yaatu. bitnamyim jaikikai inen a teuwa, jinan jinamiam poponwame kubajita benasia, si´ime aniapo juebena yoolutu´riampo jakwo naateka aayuk, im ket jumak jiak lutu´uria katek. Jume jiponiam jippu´urim kubaji jiawai betchi´ibo, pajko´ola yi´iwapo wepulai; wiko ya´ura betchi´ibo woi, matachiinim benasia. Ju kubaji inime betchi´ibo ket ju´unakiachi bwe´ituk wikiata jippue senu jiawaita betchi´ibo. Jume jiak kubajim kuta asoolam ket jaikim te inim remtane, bwe’ituk ju pajkola kubaji wepul kuta asolata jiba uju’u, bweta ju wiko ya’ura woi kuta asolam uju’u, ket jiba bénasi jume matachín kubaji bweta ini’i ket kokata wi’ipo tuttaita ama kubajiapo jippue, junuen beja a jiutuau juka matachín jiawaita nunu’e.

ju jiak wiko ya’ura kubaji, jume jiakim nassuao ju áchai tampaleo jiawai mak am tetjwan into ket am nassua nunun; koloniata in wain kom yumako jume paarem ket jume jiak kubajim te’opou lutu’uriau naikiak, junuen beja jaikimposa lionokna. Ian lautipo ju kubaji jaiki wemta jippue, yee waaria ye etejo nunu, o te’opu ye nunune; Abe Mariapo ket uju’uwa, ketgo, luula yesteo into kupteo, ket mala mecha mukukp ket ju jiawai jiune; bweta ket ju kubaji jiak pajkopo jiba jiawai jiune, ju pajkola tampalaeo a jiutuane.