Pajkola baka kuusia

Ji´ojpuari

Pajkola baka kuusia, a tewapo luula baka momoipo ya’ari, goi wemta nanacha beelechim weiya, nau chuachuaktawaka soosooktawa, ju baka kusia jiawai nakammeu tua sua kiasis ama yeu jiune, goi rerebeimak ya’ari ju baka kuusia ju bat weeme kaa ili gojoriata jippue bweta tenta jipuunepo ala ili yeu wikkri junumpo luula ju tamapaleo a pujpujta; ju senu reberei junuu into beja baji gojoriam jippue goika ae bepa senu into ae betuk, jume bepa kateme goi mam pusiamak tekipapanoawa into ju betuk weeme junu into bwe’u mam pusiamake; busanisi ju chukui wikia aet biititune chea bat naataka yo’awa tatem aet bibitawan.

Yo’ora nokita sualekai jan ju baka kusia juka sikkucha’ata e’etejo, jan junuu ju sikkucha’a jiateko (baka kusia) jan ju baakaot juka kabaata a jiawaimak a kokkotua; pajkolata tampaleotau yi’i bichateko bwe tua te juka kabaata sikkucha’atau ye’emta bitne aapo a yu’e; ju baka kusia jiawai ju tampaleo ama luula juka juya aniata jiapsamta ama etejone wikichim ama jiutuane, jeka jiawaita, ba’a buitemta, jume yo’awam ama nau yeweme: taabum, go’im chaeme, bakotta jaisa aapo omo wiksisimemta juya aniapo into jaiki wemta ama teteuwa; junue betchibo jiakim naasuku ju tampaleo baka kusia jiawai ujyoriata etejo; ju samai tampaleotau naikiari ini tuuwa bwe’ituk juebena batorata ane nasuk juni’i aapo ama yeu puari inia jiak lutu’uriata betchibo. Ju tampaleo tua pajkolata lutu’uriau into maso yi’iwau lutu’uriau tua ameu chapti chaaka.

Ju jiak baka kusiata bo’o jajaseka kaita ama yeu maachi, jumaa jume yoi paarem in wain yajako juka kusiata ta’ak bweta bempo jume jiakim bem lutu’uria ama yeu machiak junuen into laulauti a yo’oturiak, wate ujyoli jiawaita ama yeu machiak, juka keesam ameu bwijwakau ama yak.