Aapa

Ji´ojpuari

Ju aapa tappla nau chuaktipo ya’ari, ama nabusti into kueram jippuen, junume make ujyoli jiawaita jooa; kajonta bena, bweta gojooriata jiawaita yeu weyemta jippue; ama nabusti into ket jikau bicha tappla ili ammaali turuik koba teamta jippue, junum au chaaka jume kueram klabijam teame into ama nabusti ama wibbe yeu chaaka junume mak beja kutkutawa jume senu taka ama mamni aapa kueram jippue’u; itom jiak lutu’uriapo Sikklo XVIIpo naatepo jume paarem inika tékilta inim a kom a junaktek, junak naateka uju’uwa jiak lutu’uriapo.

Ju aapa jiakim nasuku Liosta lutu’uria bo’o jooria bwe’ituk aapo inim jiakim nasuku a juunaktek; pajkola yi’iwapo uju’uwa, bweta ju pajkola kaa tuuwau luula tammachiawa, chupiapo luula tammachiawa, into ket bebejeritau nawak ti jiuwapo luula, bweta jume usyoli aapa kuera labenta jiawaimak nau juka usyoli jiawaita yeu mammachia junume jiponim make beja jume pajkolam omo yanti jiapsi yeeka; ju pajkola aapau ye’eteko jume goi gok peppeim make bwiata tuulisi a jiutuane, junuen beja jume teneboim usyolisi jiawaita nuune; ju aapa ket kaa sestul jiba kutkuttawa, jewi, jume sonim jiponbawa make kutkuttawa.