Chapayeka majkaa

Ji´ojpuari

Chapayeka majka. Ini’i kaba beapo maamea ya’ari, yoka’i, amak kabai bwasia choonim amet chachchawa. Kia a remtawapo juni’i ye gomgomta bwe’ituk junuen junaktei (chupia); wakttila; aawampo beja sewan yokariana; beera nakane into ket sewam ama yokariana; amako ket koonata jipuune, tebek chappa bwawisubula yekane; junuen a yekaka betchibo, junuen ta’ewa “chapayeka”.
Jume chapayekam kostumbre ya’urapo uju’uwa; bem peetensia bo’o jooriakai, into waka tiempo wasultiata yumako, bempo jurasim lutu’uria inim Jiak lutu’uriapo bo’o joone, jewi, junuensan jume chapayekam ket wame Senyor Jesukristota Peenapo omo bichao bem a ta’apo ámani a bo’o jooria, Senyorta jajane, into a meene; junuen beja te waejmapo juebena chapayeka majkam kaa nanau machim te ama bitne, jewi bempo jume juriom materia boo’o jooria, bweta ket juebena chapayeka majakam nunuwa, junume majkam into watae kaa tu’isi aulame ket e’etejo, ama nas kuakteme betana, jume pekaom teame o cheasa ket a tuwawa ama etejo; ama nabusti ket chapayeka majkapo lu’ula ket wa batora ameet junene jita ofisiota bem yoeme tukapo ámani bem jippue’u: ju chapayeka a majkapo totoi boata nunubwa teko, junu into jaibu juka a matachín tukapo ámani etejo, o cheasan a matachín jiponleo tukapo amani; bweta si bera o rape nakako into ‘motam jiyokaoím’ jippueteko junuu into ket ofisio pajkoalaenteta etejo: masotune, pajkola tune, maso bwikkreo tune, pajkola tampaleo tune, pajkola aapareo into labeleo tune, o chea kia oficio moro tune.

Inia chapayeka sewata, enchim remta’u yoeme a maamea yaala, witti inim museopo a jipuuna betchibo yaa’ari, jewi bwe’ituk jume sewam kostumbre ya’urapo uju’uwame junume jojowame, bweta waejmata luuteko ó chupuko “baso jurasstamak tattawa” Looriapo.