Chapayeka kuta ejpa

Ji´ojpuari

Chapayeka kuta ejpaa, abaso kutapo ya´ari into ket ta´abwi kuta kaa betteku jojowa. Tosalisi yoka´i into kaa nanamam jiyokaim, sikilik chumuriak into bwibwisiwapo kaa jiyokiak. woi kuta ejpam aayuk: wame´e kabo kutam (ili uusim, uusi ju´ubwa yo´otume into kee jubeme) uju’ume, inime seewa jiyokaim ujyolim jippue. Jume seenu im bitchuwame, ju´u chapayeka yo´oweta betchi´ibo, ini´i beja ju chapayeka yo’owe, te´opopo jupplatune (te’opopo chupiaa tune), into junak beja jume sewam ejpadapo jipuwame sewau bicha jaamune; into ju chapayeka beja jaibu tabwisi espadam jipuune, ka sewane; triangulom teame ama yeu machiane chapayeka kuta ejpada bwawiampo; jume seewam beja ju majkatune junum a jippuene.

Ju sikili jiyokia Liojta ojbo etejo, bwe´ituk ini jinanjinamia lionokwame betchi´ibo chapayeka jippu´uri, wamee yee susuame etejo. Jume chapayekam katwame jiawaita yee tetejwa, ju ejpa chumuriammeu tajti. Ime´e kutam kaa tu´ik etejo siime juurasim attea benasia, ket taji buaktiapo tayana majkaammak Sabala Loriapo, jiojiobiam yojta betchi´ibo.