Kuta wiko’i

Ji´ojpuari

Kuta wikoi, kungo kutapo ya’ari; ju kungo kuta chea a jootu, wikoita ama yaa betchibo, junuu beja kia kotti baemta bénasi a’aneka bwan kaa kotkotte, junue betchibo bwan itom yo’owam juebena tu’i juyam ane nasuk juni’i kungo kutata ama yeu puppuasuk; jume jiakim junume wasuktiampo bettesi ameu weyeo Porfirio Diasta kaa am jiokoleka into jume bem bwiawam am u’abaekai, tua am luuta baeka amemak tuttu’i sisigok wikoim mak amekak nassuak , bempo into jume jiakim kia baka ju’iwam mak into bem kuta wikoim make omo jinne’uk; ian intoko juka kuta wiko’i, kia go’i yi’iwapo jiba uju’uwa, materiapo luula.

Senu weeme ama aayuk, ju jiak kuta wiko’i into jume baka ju’iwam kaa jaksa jiponiampo luula tammachiawa, jainsiosiokti am jijia am jijia nasuk juni’i bwe’ituk ju baka ju’iwa kuta wikoipo yechaawako into si sipesti ameka puttiwako, ju baka ju’iwa kuta wikou tajteko ket jiawaita jojoa bweta kaa jiak kubajita benasia; go’i yi’iwapo ju wiko yaut kuta wiko’ita kabaiteka yeye’e jakkopo benasiyoim mak nassuakai. Go’i yi’isuak beja yanti japteka , taa’au bicha bitchuka juka baka chamtita kuta wiko’i kuerampo beja a tuttane junuen beja chaane yumjoemcha; junuen beja tua a mammatewa ju kuta wiko’i inti ju baka chamti senu kujta ama nau jooa.