Go’i ye’eme

Ji´ojpuari

Yoemta yumaisi takaa; aapo ju yoeme, juka jiak wiko ya’urata yumalisi omo yaalata etejo, go’i chomokai, kuta wikoekai, ju’iwa tooriakai tua yumalisi omo aanalataka ama yeu maachi; ju go’i yi’iwame ketun kee yoim inim jiakimeu yajao, jaibu bo’o jooriawan; junuen beja wame itom yo’owam juka áchai Taa’a, Maala Mecha, omo go’i yaalatakai am yo’oreka ame betuk nas kuakuaktisuk; junuen omo mammateka su yeu machiak ju go’i yi’iwame jiakim nasuku, yoemtaka wate yo’awam omo saila makklataka juya aniapo amemak jiapsak.

Jume jiakim go’ita ama yeu puak, watem mak nassua betchibo bwe’ituk a tuwawa juneiyan; unna koba suak, jitá aa koba namya, siime inika aet bichaka junuen ama yewa puak, bwe’ituk aapo bwe’u see paariapo aa ama jiapsa. Ju go’i ket go’i jiisapo ta’ewa, into ket itom Ae Waalupeta Jiisapo ket ta’ewa into go’i yi’iwapo o’owimmeu jiba lutu’uria kaa jamuchimmewi, ju go’i chomo yauttau jiba lutu’uria; go’i chomopo jaiki wikit bwasia boam weiya: taawe, juchaji, choawe, taaruk, into waate; junue betchibo go’i chomota jippueteko siime waa tuuwa yo’awam jippue’u jiak yauttau kikkimun junue betchibo si a nassuan.

Go’i chomo bichapo ili ammali beekota jippue, junuu into juka bawe aniata etejo, mikkotana mampo into juka kuta wikoita weiya into a ju’iwa tooriapo into baka ju’iwam weiya. Ju go’i yi’iwame kaa jak juni yiyi’iwa bwe pajkompo jiba; inii go’i yi’iwame tua binwa naateka inim jiakim nasuku uju’uwa; bweta ju wiko ya’uratau jiba naikiari bwe’ituk nassuawamta jiba etejo; juka jiak bwia toosata a jiapsiwammak jinne’u nemta jiba etejo a bwikimpo; Ju go’i yi’iwame, into jakgo yiyi’iwa, senuk wiko yautta te’opopo a mujteko junak yiyiwa, bweta kaa teo’opopo, jaibu segunda santa ikklesiau yajako waariapo kus testikota wekkapo chakaku junum yi’ina, sep su ju mujtekame, into a mujtituakame into senu wiko yauttau chapti kikne; ket senu wiko yautta luuteko kunak ket yiyiwa, puepplo yo’oweta luuteko, kobanaota luuteko, junak aa yi’itu.