Jiak maso

Ji´ojpuari

Inii yoeme inim weekame, yumaisi juka maso yeye’emta etejo; jaisa omo a’ana, naatepo naatekai. Ketun kee jume yoin inim jiak bwiarau komyajao jaibu jume jiakim maso yeye’en; ju maso yi’iwame ju jiaki yo’o jo’arapo ama nas kuakteme, into wa siime ama tuu chuchupeme ju maso bwikwame, siime usyolisi nau chaaka, siime omo jajase; ju maso ye’eme maso kobapo siki listoniam aet chayaane, junume listoniam into juka masasai wiroa sewata jakiampo chuchupemta etejo. Ju maso ye’eme tosai tajoorim pusimmeu tajti buateka yi’ine, bwe’ituk junuen beja tua yo’awata puusimmea beja bibicha; aet bepa juka maso kobata yechane; ama nabusti ket jopoorosim taupo jippue; jume jopoorosim juka bawe aniata etejo, ju maso ye’eteko áyam jiawaimak jajaseka tuulisi ujyolisi yi’ine.

Jume maso bwikkleo bwikam, juya aniata ama bwibwika, into tua kaa yoi nokimak a kukuuta, tuttutti jiak nokipo luula; jume maso bwikkleom am bwik naateo ket ame welisi ju áchai pajkola tampaleo ket a jiawaiwa jiutuane.

Ju maso yi’iwame into ju pajkola yi’iwame jiakim betana kaa jubwa naatekai boo’o jo’oriawa into chea juka tu’i lutu’uriata weiya.

Ju maaso a ye’epo luula jiba yee tetejwa jaisa ju yo’awa juya aniapo omo uju’u, amak bwawim puseka juya nabusti bitne, o cheasan jita jikkajako, reebe into omo gomgomtane, o kaa yoem eateko, majaeteko, wate yo’awam mak naassua baeeko, o cheasan amemak alleaka ama juya aniapo nau jiapsa teko.