Jirukiam

Ji´ojpuari

Jume Jirukiam masota jiponria betchibo, juchajko kutapo ya’aari; jume Jirukiam juchajkota betala yaana aet chukula into batte kom tajati ili wittaim, junuen beja ili kuta asolata aet bepa ruuseteko beja bempola jume Jirukiam usyoli jiawaita joone; junuen a weyepo ju ba’a bweja ket ama jiune; ju ba’a bweja bwe’u bandeja ba’am tapunik bepa mobetanaaet bepa beja ju kuta asola mak beja juka bwejata bepne junuen juka jiaawaita jiutuane (masota jiapsi tea).

Jume Jirukiam jiutuawapo kia maso yi’iwapo jiba uju’uwa; maso bwikkreo jiba am uj’u bwe’ituk bemposu juka jiawaita masotau bicha bwibwise bwikapo luula; goi nau maso bwibwika ju maso bwikkleo yo’owe into ju maso bwikkleo au chapti katekame, bempo jirukiam jiutuaka maso bawikne. Jume maso bwikkleom bwiapo memétela jooka jirukiam jiutuane, jume Jirukiam into senu bweja bwiapo mobela jippueka aet bepa into jume jirukiam into mikotana mampo a bwijlataka bwejata bepa am tekaka batam maamea juka kuta asolata bwiseka jirukiamet ousia, ó chea ili lautia ama a buibuitituane, amak si chumtia, amak into e’e junuen beja ju usyoli jiawai ama yeu machine. Jume jirukiam kaa jubwa natekai inim jiak bwiarapo joome, ameriindian teapo, junak keesam in yauwao jaibu inim am remtak jume yoim; kaita chea nabusti ámeu yaawak jirukiammewi junuen bem a ta’akapo junuen ian tajti uju’uwak. Jume Jiak Jirukiam siimekut itom ou sailam bellekatana chibestawak Mejikou tajtia; jume Jiak Jirukiam junume uju’uwapo siime amuleommeu beja tammachiawan.