Maso teneboim

Ji´ojpuari

Jume maaso teneboim: jume teneboim bempola jiawaita nunu’e; jume teneboim bai sebolita jo’arapo jojowa; jabu juka bai sebolita jo’ara waksuko, ili bepa am siutaka, ili tetam chukuim jume jooboem yeu popotame nau tojaka ama waiwa am kiimane; jaibu junnuen am yaaasuko beja gogoi tebesi nau jiiksimne, jewi junuen beja am yumaariane; ama nabusti jume teneboim naat beja tettebe jume masota uju’ume kaa tua tebene 40 o 50 sentimetrom jipuune; teneboim mayoampo mota teamta ama jipuune, amak sikitune, o teweitune, o cheasan tabwi jiyokaitune bweta jiba ama a jippue, junuu into teneboimpo ujyolisi ama yeu maachi, junumenak beja bempo bem gok chabiriampo am sumaane.

Jume teneboim jiakim nasuku maso, pajakola into jume chapayekam am uju’u bem gok chabiriampo am biitalataka; jume teneboim kaa kia gogoika nau ji’ikkri, senu teneboim chea wilojkosi jiawaek junu jamut jiawai into senu into chea bette jiawaek junu o’ou jiawai, yi’iwao beja nau etejone ti jijia jume itóm yo’owam; senu etejoi ket juka yo’awata ama etejo jan ju yo’aowa jiak batweo ba’a jiibaeka noiteo jan jume naiki bakochim akamem a tatapbaeka ama aa amuka jookan jiak batwe mayoapo, junuen beja aapoik batweo a ba’a jiibaeka kom a yepsao jaibu ama bobitwan bweta ju yo’awa am ine’aka amau bicha omo jimaka yeu buitek bweta jume akamem junuen a bichaka kia sep aet wattek bweta gokimpo jiba a bwisekamme, junuka etejoita ket re’etejo jume jiak teneboim.