Kobanao bara insignia

Ji´ojpuari

Kobanao bara insignia: jiakim museopo senu kobanao baara insignia jipuuwa, jewi junuu into junum a jipuu betchibo yaari; jume kobanao baaram juupa nawapo yaarim, ammali teebe, into tuulisi tua chita betala kom bicha wak piolaisi yaari; ju baara insignia kobanaota uttea etejo, into baara bepa be’ojkok laatak into ket bwawisibula sisigokta chumu’uriak; ju baara insignia kobanoata tomtawapo chikti enerota busanipo naateka áu nanaikiawa junuen beja juka baara kobanaota yesteo ket bempo omo remoaka bichau bicha a uju’u tuana. Jaiki baara insigniam jiak nasuk jipuuwame jaibu juebena wasuktiam jippuemme, wate 200 tom wasuktiam jippue ya’arimtaka; jume kobanaom bem baarat ket toloko wi’ita aet chachcha.

Moisesta baarapo ket ta’ewa ju kobanao baara, ini’i into wasuktiapo a mampo jipuune a remuawao tajtia; jaiki kobanaom segunda Santa ikklesiapo ama nau nesawe sepsu ju Kobanao yo’owe, ju Lei segundo, Lei Teniente, Ley Mol into Lei Alawasin; junuen beja jaibu baaram makwako amemak mujmujte; ket wa yo’ora noki inian a e’etejo: jan si ju kobano jiobeko, jan ju baara insignia bakottaka áu yaalataka kobanaotau kuakteka kokosi a yaane.