Jiak wiko ya’uratau tetewawa’u

Ji´ojpuari

Ju wiko ya’ura: siime jume jiak sontaom junuka etejo, kapitanpo naatekai, teneinte, sarjento, kabo, Alpes, tampaleo, into siime waa masa utteapo tammachiawame; senu jiakita wiko yautpo omo mabetbaeteko o wiko yautpo mujtibaeteko into junuen jiakai segunda santa ikklesiau yeu yumako, ju wiko ya’ura juka achaita chea ama yo’oweta yeu puakai juka tuu etejooita ju konsejopo ta’ewamta au bicha a bwijne, jaarekisi juka bettesi machik au tetejwane kaa au pappewachik tu ooben bwe’ituk junuen maachi ju jiak wiko yautpo omo uju’ume.

Wiko yautta Mujtituawako; sepsu ju chea ama jiak yaut yo’owe juka yoo nokita au teuwataitine inia lutu’urita betana; chea bat ini’i etejoi usyolisi jiamta jume kapitanimeu mujtemmeu bicha teuwane, ama nabusti ket jume wate wiko yauchimmeu ket tammachiawa, teniente, áchai comandante, achai tampaleo, áchai alpés, áchai kabo. Ini etejoi ket wate tekilimpo ji’ojteimpo te am bitne, waka beapo ji’otelapo yoi noki au ji’otei kechia; inime teklim beja yoi ofisinampo chuaktim te a bicha.